கோடையின் வரப்பிரசாதம் வெள்ளரிக்காய்: நீர்ச்சத்து மட்டுமல்ல.. எலும்பு முதல் இதயம் வரை காக்கும் ‘சூப்பர் ஃபுட்’!

தமிழகத்தில் அக்னி நட்சத்திரம் தொடங்கி வெயில் வாட்டி வதைத்து வரும் சூழலில், தாகம் தணிக்கும் பழங்கள் மற்றும் காய்கறிகளின் பட்டியலில் வெள்ளரிக்காய்க்கு எப்போதுமே தனி மவுசு உண்டு. வெறும் குளிர்ச்சி தரும் காய் என்று மட்டும் அறியப்பட்ட வெள்ளரிக்காயில், உடலுக்குத் தேவையான எண்ணற்ற ஊட்டச்சத்துக்கள் ஒளிந்துள்ளது.

வெள்ளரிக்காயில் கிட்டத்தட்ட 95 சதவீதம் நீர்ச்சத்து உள்ளது. இது வெப்பமான நாட்களில் உடலை இயற்கையாகவே நீரேற்றத்துடனும் (Hydration), புத்துணர்ச்சியுடனும் வைத்திருக்க உதவுகிறது.

பலன்கள்: செரிமானம், சீரான ரத்த ஓட்டம் மற்றும் உடல் வெப்பநிலையைக் கட்டுப்படுத்துவதில் இது முக்கியப் பங்கு வகிக்கிறது. மேலும், நாம் உண்ணும் உணவில் உள்ள ஊட்டச்சத்துக்களை உடல் விரைவாக உறிஞ்சுவதற்கும் இது துணைபுரிகிறது.

எலும்பு மற்றும் மூட்டு ஆரோக்கியம்

வெள்ளரிக்காயில் உள்ள வைட்டமின் கே, உடல் கால்சியத்தை உறிஞ்சுவதற்கு உதவுகிறது.

ஒரு கப் நறுக்கிய வெள்ளரிக்காய், ஒரு மனிதனின் தினசரி வைட்டமின் கே தேவையில் 20 சதவீதத்தைப் பூர்த்தி செய்கிறது.

இதில் உள்ள சிலிக்கா என்னும் நுண்ணிய தாது, மூட்டுகள் மற்றும் இணைப்புத் திசுக்களை வலுப்படுத்துகிறது. இதனால், மூட்டு வலியால் அவதிப்படும் முதியவர்கள் வெள்ளரிக்காயைத் தவறாமல் உட்கொள்வது அவசியம்.

செரிமானத்தின் சிறந்த நண்பன்

மலச்சிக்கல் பிரச்சனை உள்ளவர்களுக்கு வெள்ளரிக்காய் ஒரு சிறந்த தீர்வாகும். இதிலுள்ள நார்ச்சத்து மற்றும் அதிக நீர்ச்சத்து, குடல் இயக்கத்தைச் சீராக்கி, உடலில் உள்ள கழிவுகளை மென்மையாக்கி எளிதாக வெளியேற்ற உதவுகிறது.

எடை குறைப்பு மற்றும் இதய பாதுகாப்பு

உடல் எடையைக் குறைக்க விரும்புவோருக்கு வெள்ளரிக்காய் ஒரு வரப்பிரசாதம்.

எடை மேலாண்மை: குறைந்த அளவு கலோரி மற்றும் அதிக நார்ச்சத்து இருப்பதால், இதைச் சாப்பிடும்போது வயிறு நிறைந்த உணர்வைத் தரும்; தேவையற்ற பசியைக் கட்டுப்படுத்தும்.

இதய ஆரோக்கியம்: இதில் உள்ள பொட்டாசியம், உடலில் சோடியம் அளவைச் சமநிலைப்படுத்தி ரத்த அழுத்தத்தைக் கட்டுக்குள் வைக்கிறது. மேலும், இதிலுள்ள ஆன்டி-ஆக்சிடென்ட்கள் கெட்ட கொழுப்பைக் (LDL) குறைக்க உதவுகின்றன.

சருமப் பொலிவு மற்றும் சர்க்கரை நோய் மேலாண்மை

அழகு நிலையங்களில் வெள்ளரிக்காய் பயன்படுத்தப்படுவதற்கு அதன் ஈரப்பதமூட்டும் தன்மையே காரணம். சிலிக்கா சத்து கொலாஜன் உற்பத்தியை அதிகரித்து சருமத்தை மென்மையாக்குகிறது.

சர்க்கரை நோய்: வெள்ளரிக்காயில் கிளைசெமிக் குறியீடு (Glycemic Index) குறைவாக இருப்பதால், இது ரத்தச் சர்க்கரை அளவை அதிகரிக்காது. எனவே, சர்க்கரை நோயாளிகள் இதனைத் தாராளமாக உணவில் சேர்த்துக்கொள்ளலாம்.