தமிழ்நாடு அரசுக்கு இசைப்புயல் ஏ.ஆர். ரஹ்மான் நெகிழ்ச்சி கலந்த நன்றி!

சென்னை: நீண்ட இடைவெளிக்குப் பிறகு தமிழ்நாடு அரசின் திரைப்பட விருதுகள் அறிவிக்கப்பட்டுள்ள நிலையில், உலகப் புகழ்பெற்ற இசையமைப்பாளர் ஏ.ஆர். ரஹ்மான் தனது மகிழ்ச்சியை வெளிப்படுத்தியுள்ளார்.

தமிழகத்தில் கடந்த சில ஆண்டுகளாக வழங்கப்படாமல் இருந்த 2016 முதல் 2022-ம் ஆண்டு வரையிலான திரைப்பட விருதுகளைத் தமிழ்நாடு அரசு சமீபத்தில் அதிகாரப்பூர்வமாக அறிவித்தது. இதில் கலைத்துறை சார்ந்த பல ஆளுமைகள் கௌரவிக்கப்பட்டுள்ளனர்.

பொன்னியின் செல்வனுக்குக் கிடைத்த அங்கீகாரம்:

மணி ரத்னம் இயக்கத்தில் வெளியான வரலாற்றுப் காவியமான ‘பொன்னியின் செல்வன் – 1’ திரைப்படத்திற்காக, ஏ.ஆர். ரஹ்மானுக்குச் சிறந்த இசையமைப்பாளர் விருது அறிவிக்கப்பட்டுள்ளது. சோழர் காலத்து உணர்வுகளைத் தனது இசையால் மீட்டுருவாக்கம் செய்த ரஹ்மானுக்கு, இந்த விருது பொருத்தமான ஒன்றாகப் பார்க்கப்படுகிறது.

எக்ஸ் (X) தளத்தில் ரஹ்மானின் நெகிழ்ச்சி:

இந்த அறிவிப்பு வெளியானதைத் தொடர்ந்து, தனது அதிகாரப்பூர்வ சமூக வலைதளப் பக்கத்தில் ஏ.ஆர். ரஹ்மான் பதிவிட்டுள்ளதாவது:

“பொன்னியின் செல்வன் – 1 திரைப்படத்திற்காகத் தமிழ்நாடு அரசின் விருதைப் பெறுவதில் நான் பெரும் பெருமை கொள்கிறேன். கலைத் திறனை அங்கீகரித்து கௌரவித்த தமிழ்நாடு அரசுக்கு எனது மனமார்ந்த நன்றிகளைத் தெரிவித்துக் கொள்கிறேன். என்னுடன் இந்த விருதுப் பட்டியலில் இடம்பெற்றுள்ள மற்ற கலைஞர்கள் மற்றும் சாதனையாளர்கள் அனைவருக்கும் எனது அன்பான வாழ்த்துகள்.”

ஏற்கனவே தேசிய விருதுகள் மற்றும் ஆஸ்கர் விருதுகளை வென்றுள்ள ரஹ்மானுக்கு, சொந்த மாநில அரசின் விருது வழங்கப்பட்டிருப்பது அவரது ரசிகர்களிடையே பெரும் உற்சாகத்தை ஏற்படுத்தியுள்ளது. சமூக வலைதளங்களில் #ARRahman மற்றும் #TamilNaduStateAwards போன்ற ஹேஷ்டேக்குகள் வைரலாகி வருகின்றன.