நிஃபா வைரஸ்: இந்தியாவுக்குப் பெரிய அச்சுறுத்தல் இல்லை – சர்வதேச பயணக் கட்டுப்பாடுகளுக்கு முற்றுப்புள்ளி வைத்தது உலக சுகாதார நிறுவனம்!

இந்தியாவில் கண்டறியப்பட்ட நிஃபா வைரஸ் பாதிப்புகள் குறித்து சர்வதேச அளவில் தேவையற்ற அச்சம் நிலவி வரும் சூழலில், உலக சுகாதார நிறுவனம் (WHO) வெளியிட்டுள்ள சமீபத்திய அறிக்கை இந்தியாவுக்கு மிகப்பெரிய நிம்மதியை அளித்துள்ளது. “இந்தியாவில் நிஃபா வைரஸ் பரவல் ஒரு பெரிய அச்சுறுத்தலாக இல்லை” என்று அந்த அமைப்பு திட்டவட்டமாகத் தெரிவித்துள்ளது.

மேற்கு வங்க பாதிப்பும் சர்வதேசப் பதற்றமும்:

சமீபத்தில் மேற்கு வங்க மாநிலத்தில் இரண்டு பேருக்கு நிஃபா வைரஸ் தொற்று உறுதி செய்யப்பட்டது. இதனைத் தொடர்ந்து, ஆசிய நாடுகளான சீனா, தாய்லாந்து, நேபாளம், தைவான் மற்றும் மலேசியா ஆகியவை இந்தியாவிலிருந்து வரும் பயணிகளுக்குக் கடுமையான மருத்துவப் பரிசோதனைகளை மேற்கொள்ளத் தொடங்கின. இதனால் இந்தியா மீது சர்வதேசப் பயண மற்றும் வர்த்தகத் தடைகள் விதிக்கப்படலாம் என்ற அச்சம் நிலவியது.

உலக சுகாதார நிறுவனத்தின் அதிரடி விளக்கம்:

இந்த விவகாரம் குறித்து அதிகாரப்பூர்வ அறிக்கை வெளியிட்டுள்ள உலக சுகாதார நிறுவனம், பின்வரும் முக்கியத் தகவல்களைத் தெளிவுபடுத்தியுள்ளது.

கட்டுப்பாடுகள் தேவையில்லை: நிஃபா வைரஸ் காரணமாக இந்தியாவிற்குச் செல்லவோ அல்லது அங்கிருந்து வர்த்தகம் செய்யவோ எந்தவிதக் கட்டுப்பாடுகளையும் விதிக்க வேண்டிய அவசியம் தற்போது இல்லை.

குறைவான பரவல் வேகம்: இந்த வைரஸ் ஒருவரிடமிருந்து மற்றொருவருக்கு அதிவேகமாகப் பரவுகிறது என்பதற்கு இதுவரை எந்த அறிவியல் பூர்வமான ஆதாரங்களும் கிடைக்கவில்லை. எனவே, உலக அளவில் இதற்கான ஆபத்து மிகக் குறைவு.

உள்ளூர் அளவிலான கட்டுப்பாடு: பாதிக்கப்பட்ட இரண்டு நபர்களும் எங்கும் பயணம் செய்யவில்லை என்பதை இந்திய அரசு உறுதி செய்துள்ளது. இதனால், இந்தத் தொற்று இந்தியாவின் பிற மாநிலங்களுக்கோ அல்லது அண்டை நாடுகளுக்கோ பரவுவதற்கான வாய்ப்புகள் இல்லை.

சீனாவின் கூடுதல் எச்சரிக்கை:

உலக சுகாதார நிறுவனம் நிம்மதியளித்தாலும், அண்டை நாடான சீனா மட்டும் தொடர்ந்து கூடுதல் எச்சரிக்கையுடன் செயல்பட்டு வருகிறது. இந்தியா உள்ளிட்ட வைரஸ் பாதிப்பு கண்டறியப்பட்ட பகுதிகளிலிருந்து வரும் பயணிகளைத் தனது விமான நிலையங்களில் சீனா தொடர்ந்து தீவிரப் பரிசோதனைக்கு உட்படுத்தி வருகிறது. எனினும், இதுவரை சீனாவில் யாருக்கும் நிஃபா தொற்று ஏற்படவில்லை என்பது குறிப்பிடத்தக்கது.