பான் கார்டு விண்ணப்பதாரர்களுக்கு எச்சரிக்கை: ஏப்ரல் 1 முதல் புதிய விதிமுறைகள் அமல் – ஆதார் மட்டும் போதாது!

புதுடெல்லி: வருமான வரித் துறை மற்றும் நிதி சார்ந்த சேவைகளுக்கு மிக முக்கியமான ஆவணமாக விளங்கும் நிரந்தர கணக்கு எண் (PAN) விண்ணப்ப நடைமுறைகளில் மத்திய அரசு அதிரடி மாற்றங்களைக் கொண்டு வந்துள்ளது. இந்த புதிய விதிகள் வரும் ஏப்ரல் 1, 2026 முதல் நாடு முழுவதும் அமலுக்கு வரவுள்ளன.

ஆதார் மட்டும் இருந்தால் இனி பான் கார்டு கிடைக்காது!

இதுவரை, ஆதார் அட்டையை மட்டுமே முதன்மை ஆவணமாகக் கொண்டு எளிமையான முறையில் பான் கார்டு பெற்று வந்த நடைமுறைக்கு தற்போது முற்றுப்புள்ளி வைக்கப்பட்டுள்ளது. ஏப்ரல் 1-ஆம் தேதிக்குப் பிறகு, ஆதார் அட்டையை மட்டும் பயன்படுத்திச் செய்யப்படும் விண்ணப்பங்கள் நிராகரிக்கப்படும் என்று மத்திய பொது சேவை மையங்கள் (CSC) எச்சரித்துள்ளன.

மார்ச் 31-ஆம் தேதியுடன் பழைய நடைமுறை முடிவுக்கு வருவதால், புதிய விதிகளின்படி விண்ணப்பதாரர்கள் கூடுதல் ஆவணங்களைச் சமர்ப்பிப்பது கட்டாயமாக்கப்பட்டுள்ளது.

தேவைப்படும் கூடுதல் ஆவணங்கள் என்னென்ன?

பான் கார்டு விண்ணப்பத்தின் போது பிறந்த தேதியை (Date of Birth) உறுதிப்படுத்துவது மிக அவசியமான ஒன்றாக மாற்றப்பட்டுள்ளது. இதற்காகப் பின்வரும் ஆவணங்களில் ஏதேனும் ஒன்றை ஆதாரத்துடன் இணைக்க வேண்டும்:

• நகராட்சி அல்லது அதிகாரப்பூர்வ அமைப்பால் வழங்கப்பட்ட பிறப்புச் சான்றிதழ்.
• வாக்காளர் அடையாள அட்டை (Voter ID).
• ஓட்டுநர் உரிமம் (Driving License).
• பாஸ்போர்ட்.
• பத்தாம் வகுப்பு அல்லது அதற்கு இணையான மெட்ரிகுலேஷன் சான்றிதழ்.

மாறப்போகும் விண்ணப்பப் படிவங்கள்

புதிய விதிகள் அமலுக்கு வந்த பிறகு, பான் கார்டுக்கான தற்போதைய விண்ணப்பப் படிவங்களிலும் மாற்றங்கள் செய்யப்படும் என்று பொது சேவை மையங்கள் தங்களது ‘X’ (ட்விட்டர்) சமூக ஊடகப் பக்கத்தில் தெளிவுபடுத்தியுள்ளன. கூடுதல் தகவல்களைப் பெறும் வகையில் இந்தப் படிவங்கள் மாற்றி அமைக்கப்பட உள்ளன.

IMPORTANT UPDATE!!

PAN Application Rules Changing From 1st April 2026.

Apply Now Using Aadhaar Only Till 31st March 2026.

महत्वपूर्ण अपडेट!!

PAN बनवाने का अच्छा मौका 31 मार्च 2026 तक सिर्फ आधार से PAN बनवाएं.

For any queries, write us at abhirendra.pal@csc.gov.in… pic.twitter.com/JdpWQkR498

— CSCeGov (@CSCegov_) March 17, 2026

இ-பான் (e-PAN) பெறுவோருக்குச் சலுகை

உடனடியாக பான் எண் தேவைப்படுபவர்கள், வருமான வரித் துறையின் அதிகாரப்பூர்வ இ-ஃபைலிங் (e-Filing) போர்ட்டல் மூலம் மின்னணு பான் கார்டை (e-PAN) பெற்றுக்கொள்ளலாம் என்றும் தெரிவிக்கப்பட்டுள்ளது. இருப்பினும், பிளாஸ்டிக் கார்டாகப் பெற விரும்புவோர் புதிய விதிமுறைகளின் கீழ் கூடுதல் ஆவணங்களை வழங்க வேண்டியிருக்கும்.

வங்கி கணக்கு தொடங்குவது முதல் சொத்து வாங்குவது வரை அனைத்து முக்கிய நிதிப் பரிவர்த்தனைகளுக்கும் பான் கார்டு அவசியம் என்பதால், பொதுமக்கள் இந்த மாற்றங்களைக் கவனத்தில் கொண்டு செயல்படுமாறு அறிவுறுத்தப்படுகிறார்கள்.