இந்தியாவிற்கும் கனடாவிற்கும் இடையிலான பதட்டத்தின் பின்னணியில், கனடா நாட்டினருக்கான விசா சேவைகளை இந்தியா இன்று (செப்டம்பர் 21) வியாழக்கிழமை நிறுத்தியுள்ளது.
காலிஸ்தான் பயங்கரவாதி ஹர்தீப் சிங் நிஜ்ஜார் கொல்லப்பட்டதற்குப் பின்னணியில் இந்தியா இருப்பதாக கனடா குற்றம் சாட்டியதைத் தொடர்ந்து இரு நாடுகளுக்கும் இடையேயான உறவுகள் மோசமடைந்தன. இந்திய விசா சேவைகள் செப்டம்பர் 21 முதல் நிர்வாக காரணங்களுக்காக இடைநிறுத்தப்பட்டுள்ளதாக கனேடியர்களின் விசா விண்ணப்பங்களைச் செயல்படுத்த நியமிக்கப்பட்ட தனியார் நிறுவனமான BLS தெரிவித்துள்ளது.
இதற்கிடையில், கனேடியர்களுக்கான விசா சேவைகள் நிறுத்தப்பட்டதை இந்திய அதிகாரிகள் உறுதிப்படுத்தியுள்ளனர். மறுபுறம், இந்தியாவிற்கும் கனடாவிற்கும் இடையிலான உறவில் விரிசல் ஏற்பட்டுள்ளதால், கனடாவில் இந்தியர்கள் மிகுந்த எச்சரிக்கையுடன் இருக்க வேண்டும் என்று இந்தியா தனது குடிமக்களுக்கு வழிகாட்டுதல்களை வெளியிட்டுள்ளது.
கனடாவில் உள்ள காலிஸ்தான் ஆதரவு சக்திகளுக்கு எதிராக நடவடிக்கை எடுக்குமாறு இந்தியா விடுத்த அழைப்பை அந்நாட்டு அரசு அலட்சியப்படுத்தியதால் இரு நாடுகளுக்கும் இடையேயான உறவில் விரிசல் ஏற்பட்டுள்ளதாக அதில் தெரிவிக்கப்பட்டுள்ளது. இதன் மூலம், கனடாவில் இந்திய விரோத நடவடிக்கைகள், அரசியல் உள்நோக்கம், வெறுப்பு குற்றங்கள் மற்றும் வன்முறைகள் அதிகரித்து வருவதாக கவலை தெரிவித்துள்ளது.
இந்நிலையில், கனடாவுக்கு செல்ல விரும்பும் இந்திய குடிமக்கள், மாணவர்கள் மற்றும் கனடாவில் உள்ள இந்தியர்கள் மிகுந்த எச்சரிக்கையுடன் இருக்க வேண்டும் என மத்திய வெளியுறவுத்துறை அமைச்சகம் தெரிவித்துள்ளது. இந்திய குடிமக்கள் அவசரகாலத்தில் கனடாவில் உள்ள இந்திய தூதரகத்தை தொடர்பு கொள்ளுமாறு கேட்டுக் கொள்ளப்பட்டுள்ளனர். இதற்கான உத்தரவுகளை புதன்கிழமை வெளியிட்டது. கனடாவில் 2,30,000 இந்திய மாணவர்களும் 7,00,000 இந்திய புலம்பெயர்ந்தோரும் இருப்பதாக மதிப்பிடப்பட்டுள்ளது.
