பட்ஜெட் அறிவிப்புக்கு பின் விலை கூடும், குறையும் பொருட்கள் இவைதான்!

2024-25ஆம் ஆண்டுக்கான மத்திய பட்ஜெட் அறிவிப்பால், சில பொருட்களின் விலைகள் உயரும், மற்றவற்றின் விலை குறையும். நிதியமைச்சர் நிர்மலா சீதாராமன் 2024-25 பட்ஜெட்டில் புற்றுநோயாளிகளுக்கு நிவாரணம் வழங்கும் முக்கிய அறிவிப்பை வெளியிட்டார். மேலும் 3 புற்றுநோய் சிகிச்சை மருந்துகளுக்கு சுங்க வரியில் இருந்து அரசு விலக்கு அளித்துள்ளது தெரியவந்துள்ளது. இதனால் புற்றுநோய் மருந்துகளின் விலை குறையும்.

செல்போன்களுக்கான சுங்க வரி வெகுவாக குறைக்கப்படுவதாக சீதாராமன் அறிவித்துள்ளார். இதன் காரணமாக சில்லறை சந்தையில் போன்களின் விலை கணிசமாக குறையும். சார்ஜர்கள் மற்றும் பிற மொபைல் உதிரிபாகங்களுக்கான சுங்க வரி குறைக்கப்படுகிறது. இதனால் அவற்றின் விலையும் குறையும். தோல் பொருட்கள் மற்றும் கடல் உணவுகளின் விலையும் மலிவாக மாறும்.

உள்நாட்டில் அதிக தேவை உள்ள தங்கம் மற்றும் வெள்ளி இறக்குமதி மீதான இறக்குமதி வரியும் குறைக்கப்படுகிறது என்று சீதாராமன் கூறினார். வரி 10 சதவீதத்தில் இருந்து 6 சதவீதமாக குறைக்கப்படுவதால், இந்த இரண்டு விலையுயர்ந்த உலோகங்களின் விலை குறையும். இறக்குமதி வரி குறைக்கப்பட்டுள்ளதால், உள்நாட்டில் தங்கத்தின் தேவை மேலும் அதிகரிக்கும் என எதிர்பார்க்கப்படுகிறது. பிளாட்டினம் இறக்குமதிக்கான வரி 6.4 சதவீதமாக குறைக்கப்படுவதாக பட்ஜெட்டில் மத்திய அரசு தெரிவித்துள்ளது. இதனால், அவற்றின் விலை குறையும்.

சுற்றுச்சூழலைக் கருத்தில் கொண்டு சில பிளாஸ்டிக் பொருட்களின் இறக்குமதிக்கான வரியை அரசாங்கம் உயர்த்தியுள்ளது. அம்மோனியம் நைட்ரேட் மீது 10 சதவீதமும், மக்காத பிளாஸ்டிக்கிற்கு 25 சதவீதமும் சுங்க வரியை அரசு உயர்த்தியுள்ளது. இதனால் பிளாஸ்டிக் பொருட்களின் விலை உயரும். தொலைத் தொடர்பு சாதனங்களின் விலையும் உயரும்.