நாடாளுமன்ற குளிர்கால கூட்டத்தொடரில் இருந்து 92 எம்பிக்கள் சஸ்பெண்ட்..!

நாடாளுமன்ற குளிர்கால கூட்டத்தொடரின் போது எதிர்க்கட்சி எம்.பி.க்கள் மீது சபாநாயகர் முக்கிய நடவடிக்கை எடுத்துள்ளார். நாடாளுமன்ற குளிர்கால கூட்டத் தொடரில் இருந்து 92 எம்பிக்கள் சஸ்பெண்ட் செய்யப்பட்டுள்ளனர். பாராளுமன்ற கூட்டத்தொடரின் போது அதிக எண்ணிக்கையிலான எம்.பி.க்கள் இடைநீக்கம் செய்யப்பட்ட சம்பவம் இதுவாகும். இன்று மக்களவையில் 33 எம்பிக்களும், ராஜ்யசபாவில் இருந்து 45 எம்பிக்களும் சஸ்பெண்ட் செய்யப்பட்டுள்ளனர். முன்னதாக 14 எம்பிக்கள் இடைநீக்கம் செய்யப்பட்டனர். இதில் மக்களவை காங்கிரஸ் தலைவர் ஆதிர் ரஞ்சன் சவுத்ரியும் இடம்பெற்றுள்ளார். மேலும் மூன்று உறுப்பினர்கள் சிறப்புரிமைக் குழுவின் அறிக்கை வரை இடைநீக்கம் செய்யப்பட்டுள்ளனர்.

இந்த எம்.பி.க்கள் அனைவரும் குளிர்கால கூட்டத்தொடருக்கு இடைநீக்கம் செய்யப்பட்டுள்ளனர். கடந்த வாரம் நாடாளுமன்றத்தின் பாதுகாப்பில் ஏற்பட்ட குளறுபடிக்கு எதிராக நடைபெற்ற ஆர்ப்பாட்டத்தின் போது சபை நடவடிக்கைகளை இடையூறு செய்தமைக்காக எம்.பி.க்கள் மீது சஸ்பெண்ட் நடவடிக்கை எடுக்கப்பட்டுள்ளது. பதாகைகளை காட்டியதற்காக நடவடிக்கை எடுக்கப்பட்டுள்ளது. லோக்சபா சபாநாயகர் ஓம் பிர்லா, எம்.பி.க்கள் பிளக்ஸ் பேனர்களுடன் வர வேண்டாம் என்று கேட்டுக் கொண்டாலும், எம்.பி.க்கள் மேடைக்கு முன் பிளக்ஸ் பேனர்களுடன் வந்து முழக்கங்களை எழுப்பினர்.

சஸ்பெண்ட் செய்யப்பட்ட எம்.பி.க்களில் திமுக எம்.பி.க்கள் டி.ஆர்.பாலு, தயாநிதி மாறன் மற்றும் திரிணாமுல் காங்கிரஸ் கட்சியின் சவுகதா ராய் ஆகியோர் அடங்குவர். நாடாளுமன்ற விவகாரத்துறை அமைச்சர் பிரகலாத் ஜோஷி இடைநீக்கம் தொடர்பான முன்மொழிவை முன்வைத்தார், இது குரல் வாக்கெடுப்பு மூலம் நிறைவேற்றப்பட்டது. எம்.பி.க்கள் இடைநீக்கம் செய்யப்பட்டதையடுத்து, அவை நடவடிக்கைகள் நாள் முழுவதும் ஒத்திவைக்கப்பட்டது.