சுவையான சின்ன வெங்காய சாம்பார் செய்முறை

பாரம்பரிய முறைப்படி வெறும் 10 நிமிடத்தில் அற்புதமான ருசியான சின்ன வெங்காய சாம்பார் எப்படி செய்வது என்று இந்த பதிவில் பார்க்கலாம்.

தேவையான பொருட்கள்

துவரம் பருப்பு – 1 கப் அல்லது 200 கிராம்

தண்ணீர் – 2 கப்

மஞ்சள் தூள் – 1/4 தே.கரண்டி

பெருங்காயத் தூள் – 1 சிட்டிகை

எண்ணெய் – 3 தே.கரண்டி

கடுகு – 1 தே.கரண்டி

வெந்தயம் – 1/4 தே.கரண்டி

சீரகம் – 1/2 தே.கரண்டி

பெருங்காயத் தூள் – 1/4 தே.கரண்டி

சின்ன வெங்காயம் – 200 கிராம்

பச்சை மிளகாய் – 2 (நறுக்கியது)

கறிவேப்பிலை – 1 கொத்து

வரமிளகாய் – 1

தக்காளி – 1 (பொடியாக நறுக்கியது)

உப்பு – சுவைக்கேற்ப

சாம்பார் தூள் – 1 1/2 தே.கரண்டி

புளி – சிறிய எலுமிச்சை அளவு (நீரில் ஊற வைத்து சாறு எடுத்துக் கொள்ளவும்)

கொத்தமல்லி – சிறிதளவு

செய்முறை

முதலில் துவரம் பருப்பை சுத்தம் செய்து குக்கரில் போட்டு அத்துடன், 2 கப் நீர், மஞ்சள் தூள், பெருங்காயத் தூள் ஆகியவற்றை சேர்த்து 2 விசில் வரும் வரையில் நன்றாக வேக வைத்து எடுத்துக்கொள்ள வேண்டும்.

பின்பு ஒரு பாத்திரத்தை அடுப்பில் வைத்து, அதில் எண்ணெய் ஊற்றி சூடானதும், கடுகு, வெந்தயம், சீரகம், பெருங்காயத் தூள் ஆகியவற்றை போட்டு தாளித்துக்கொள்ள வேண்டும்.

அதனையடுத்து சின்ன வெங்காயத்தை சேர்த்து 2 நிமிடம் வதக்கி, பச்சை மிளகாய், கறிவேப்பிலை, வரமிளகாய் ஆகியவற்றையும் போட்டு நன்றாக வதக்கிக்கொள்ள வேண்டும்.

பின்னர் அதில் தக்காளி மற்றும் தேவையான அளவு உப்பு சேர்த்து, அதில் சாம்பார் தூளை சேர்த்து 1 நிமிடம் வரையில் மிதமான தீயில் வேகவிட வேண்டும்.

பின்னர் சிறிது தண்ணீர் ஊற்றி கலந்து, மூடி வைத்து 5 நிமிடங்கள் வரையில் நன்றாக கொதிக்க விட்டு, புளிச்சாற்றினை ஊற்றி 5 நிமிடங்கள் வேகவிட வேண்டும்.

இறுதியாக நறுக்கிய கொத்தமல்லியைத் தூவி இறக்கினால், ருசியான சின்ன வெங்காய சாம்பார் தயார்.