கடந்த சில வாரங்களுக்கு முன்னர் ‘மூக்குத்தி அம்மன் 2’ திரைப்படம் குறித்த தகவல் வெளியானது. தற்போது இந்த படத்தின் இயக்குனர் யார் என்ற தகவல் கசிந்துள்ளது.
வேல்ஸ் ஃபிலிம்ஸ் இன்டர்நேஷனல் தயாரிப்பில் ஆர்.ஜே.பாலாஜி இயக்கத்தில் லேடி சூப்பர் ஸ்டார் நயன்தாரா நடித்த ‘மூக்குத்தி அம்மன்’ திரைப்படம் 2020ஆம் ஆண்டு வெளியாகி மாபெரும் வெற்றி பெற்றது.
இந்த நிலையில், ‘மூக்குத்தி அம்மன் 2’ படத்தை வேல்ஸ் பிலிம்ஸ் இன்டர்நேஷனல் மற்றும் ரவுடி பிக்சர்ஸ் இணைந்து தயாரிக்க இருப்பதாக சமீபத்தில் அறிவிக்கப்பட்டது. மேலும் இந்த படத்தில் அம்மன் கேரக்டரில் நயன்தாரா நடிப்பார் என அறிவிக்கப்பட்டாலும் படத்தை இயக்குவது யார் என்ற கேள்வி எழுந்தது.
ஆர்.ஜே.பாலாஜி த்ரிஷாவை வைத்து ‘மாசாணி அம்மன்’ படத்தை இயக்கப் போவதாக ஏற்கனவே கூறப்பட்ட நிலையில், ‘மூக்குத்தி அம்மன் 2’ படத்தை ஆர்.ஜே.பாலாஜி இயக்கவில்லை என்பது உறுதியாகியுள்ளது. தற்போதைய தகவலின்படி, இந்த படத்தை சுந்தர் சி இயக்க ஒப்புக்கொண்டுள்ளதாகவும், விரைவில் அறிவிப்பு வெளியாகும் என்றும் கூறப்படுகிறது.
